Sorkar laipuiin Assam tan SDRF tipung

Assam state-in State Disaster Response Fund (SDRF) hmanga sorkar laipui aṭanga ṭanpuina a dawn ṭhin chu kum kal mekah vaibelchhe 483-ah a pung chho.

State Disaster Manage-ment Authority chuan hemi atan hian sorkar laipui chuan a thawh khatna atan vaibelchhe 217.35 chu a pe chhuak tawh a, state sorkarin a tum ve tur vaibelchhe 48.30 pawh pek chhuah tawh a nih thu a tarlang. He sum hi tuilian leh chhan hrang hrang vanga harsatna tawkte chhawmdawlna atana hman tur a ni. Kum kalta khan sorkar laipuiin SDRF atana Assam sorkar a pek chu vaibelchhe 460 a ni a, a punna hi vaibelchhe 23 a ni. State sorkar chuan heng ṭanpuina sum te hi kumin fur hma khan deputy commissioner te hnenah a pe chhuah tawh a, a ṭul dan anga tuilian tuarte chhawmdawl nana hman tura tih a ni.

SDRF sum hian leimin avanga chhiatna tawkte a huam tel loh avangin state sorkar chuan sorkar laipuiah ngenna a siam a, sorkar laipui chuan pawmpuiin SDRF hian leimin avanga chhiat tawkte chhawmdawlna pek a huam tawh a ni. Hemi chungchangah hian State Disaster Management Authority chuan Finance Department-ah leimin avanga chhiat tawk zángnadawmna dawng thei chin tifel turin a lo ngen tawh bawk. DMA tarlan danin tuilian avangin ei tur neilo an awm rih lo a, mahse state sorkar chuan buhfai-a harsatna an tawh lohna turin Food Corporation of India (FCI)-ah ngenna an thlen tawh.

Hetih lai hian state sorkar chuan SDRF thawh khatnaa sum te hi a hmang zo a, sorkar laipui chu a thawh hnih nana sum pe chhuak turin a inkau leh mek nia tarlan a ni. State sorkar chuan sum hi a indaih lo a nih chuan, an harsatna tawh dan azirin National Disaster Response Fund (NDRF)-ah ṭanpuina a la dilbelh thei bawk. Sorkar laipui chuan high-level team te chu Assam-ah a tir lut tawh a, an harsatna tawh mek chu a hmunah kalin an zirchiang dawn a ni.