NRC dik taka kalpui a ni : Assam MP

Assam Member of Parliament (MP) Bijoya Chakravarty chuan an state-a National Register of Citizens (NRC) kalpui mek chungchang Lok Sabha-ah sawi chhuakin, document diklo 20,000 chuang hmuh chhuah a nih tawh thu sawiin, mi 28 te chu man an nih tawh tih a sawi.

Chakravarty chuan NRC pawimawhna hriain state sorkar chuan dik taka a kalpui thu a sawi. Congress sokar hun laiin sum lama harsatna a awm avangin chawlhsan lailawk a nih thu sawiin, Narendra Modi kaihhruai sorkar chuan kum 2014 khan hnathawh chhunzawmna turin cheng vaibelchhe 280 a pe chhuak leh a ni, a ti. Hna chu chak taka kalpui a ni a, 98% chu zawh fel a ni tawh tih MP kalkhawm hmaah a sawi. Media report-a hnam hnuaihnung zawkte enhranna awm anga tarlan chu a dik loh thu Chakravarty chuan tarlangin, mi tu ten emaw sorkar beih nana an thu thehdarh mai a ni, a ti. Ṭhenawm ram Banghladesh aṭanga pem lut Assam-a khawsa zuite avanga harsatna an tawh thu a tarlang tel bawk.