Amit Shah-a'n Congress paihthlakna tur beihpui a thlak

BJP president Amit Shah chuan Pathianni khan Assam-a Congress party paihthlakna tura beihpui thlakna, 'oust Congress' campaign a tlangzarh.

Shah chuan nakkum March-April thlaa state assembly inthlanna neih turah Assam-a rorellai Congress party chu paihthlak ngei an nih theih nan mipuite chu lo inbuatsaih lawk turin a ngen.

Assam-a Bangladesh mi pemlutte chungchang sawiin Shah chuan BJP sorkar chauh chu pemlutte dapchhuak a, an rama thawnkir thei a ni, a ti.

"Bangladesh aṭanga pemlutte chuan engkim min laksak tawh a, mahse Congress sorkar chuan eng mah a ti ngam lo a ni. Bangladesh pemlutte lak aṭanga Assam tizalen theitu chu BJP chauh a ni," tiin BJP president chuan a sawi.

Assam-a India khua leh tui dik takte chhinchhiahna atana National Register of Citizens (NRC) update kalpui mek chu sorkar laipuia BJP sorkar hmalakna a ni, tiin hemi atan hian sorkar laipui chuan state sorkar chu cheng vaibelchhe 140 a ruahmansak a ni, a ti.

"NRC update chu peihfel a nih chuan Bangladesh mi pemlutte chu hriatchhuah an ni ang a, mahse hei hi Congress sorkar chuan a duh lo a, pemlutte vote a duh zawk a ni," a ti.

Hetihlai hian Shah chuan Bangladesh Hindu mi, India-a raltlante chu khua leh tui nihna pek an nih tur thu a sawi.

"Hemi kawngah hian Assam chu a buai a ngai lo a, Bangladesh Hindu raltlante hi India rampumin a buaipui dawn a ni," a ti.

"India-in zalenna a hmuh aṭang­in Assam-ah Asom Gana Parishad (AGP)-in term hnih sorkarna an chan bak chu Congress party chuan sorkarna a chang tawh a, mahse Congress chuan khawi hmun nge Assam a hruai thlen? Eirukna thubuai leh sum chingpen tam tak a hmachhawn reng a, Comptroller and Auditor General (CAG) chuan cheng vaibelchhe 13,000 tihchingpenna a hailang tawh a, hemi rual hian agriculture department leh public distribution system (PDS)-ah pawh sum chingpen a awm a ni. Congress hruaitute chu Sharadha chit fund scam-ah inhnamhnawiha puh an ni bawk a ni," tiin Shah chuan a sawi.

BJP national president Shah chuan Congress vice-president Rahul Gandhi chu sawiselin, "Chhungte ro chhawm tur nei saa piang Rahul-baba te ang tan chuan BJP-in sorkarna a chan aṭanga hmasawnna a thlente chu thil hmuh awlsam tak a ni lo reng a ni," a ti.

"Rampawn tarmit i vuah chuan India rama thil danglamna thleng mek chu i hmu thei lo ang a, India tarmit siam vuah la, Prime Minister Narendra Modi-a'n danglamna a thlente i hmu thei ang," tiin a sawi.

Shah chuan Prime Minister Modi kaihhruaina hnuaia danglamna thlengte tarlangin, thil man sang chho zel chu khuahkhirh a nih tawh thu leh tuialhthei man a tlak hniam thu a sawi a, BPL chhungkua vaibelchhe 14 chuangin bank account an hawn tawh tawh thu a sawi bawk.