NE-a CEO te meeting nei dawn

Hmarchhak state pariata Chief Electoral Officer te chuan April 29 hian National Electoral Roll Purification and Authentication Programme (NERPAP) kalpui dan chungchang ngaihtuahin Shillong-ah meeting an nei dawn.

Meghalaya Chief Electoral Officer P. Naik chuan meeting hi Election Commission of India-in a koh thu sawiin, Deputy Election Commissioner of India Vinod Zutshi-a'n a kaihhruai tur thu a sawi.

Khua leh tui dik tak ni lo vote neite dapchhuah nana bio metric record neih mek leh electoral roll a inmil em tih enfiah dan tur zir hona atan meeting hi neih a ni a, NERPAP hi Electoral Photo Identity Card (EPIC) leh Aadhaar card thlunzawmna atana ruahmanna a ni.

NERPAP hnuaiah hian voter te chuan SMS, e-mail, mobile application leh EC website kaltlangin National Voters Service Portal-ah an Aadhaar number leh EPIC an thlunzawm thei dawn a ni.

Phone number 1950-ah call-a voter te'n Aadhaar number leh EPIC an thlunzawm theih nan NERPAP hnuaiah ruahmanna siam tum a ni bawk.

Hetihlai hian hmarchhak bialah Aadhaar number nei tawh an la tlem hle a, Meghalaya-ah chuan kumin March 8 thleng khan mi 21,313 chauhin an la nei a, hei hi state mihring awm zawng zawng aṭangin 0.7% a ni.

Hmarchhak state danga Aadhaar card neih dan chu- Assam 0.08 % (mi 242,655), Arunachal Pradesh 12.2 % (mi 168,460), Mizoram 26.2 % (mi 286,146), Manipur 41.2 % (mi 1,120,649), Nagaland 43.2 % (mi 856,374), Sikkim 92.4 % (mi 562,562) leh Tripura 90.2 % (mi 3,317,808)