Manipur sorkar hnathawkte'n a huhoin casual leave an la

All Manipur Trade Union Council (AMTUC) leh All Manipur Government Employees Organisation (AMGEO) ṭangrual pawl, Joint Administrative Council (JAC) chuan state sorkarin an thil phut a tihhlawhtlin theih loh avanga an lungawi lohna lantir nan nimin aṭang khan a huhoin casual leave an la.

JAC te casual leave lak hi ni thum awh tur a ni a, district tina sorkar hnathawk mi 69,000 chuangin an thlawp.

Manipur sorkar hnathawkte hian an thla hlawh leh an hamṭhatna dawn chungchangah state sorkarah an thil phut point 30 an thlen a, mahse hei hi state sorkarin a tihpuitlin theih loh avangin mass casual leave lak an rel ta a ni.

M Rajendro, JAC president chuan Pathianni tlaia JAC office, Babupara-a meeting neihah mass casual leave lak an rel thu a sawi a, Inrinni tlai khan state Chief Secretary PC Lawmkunga kaih­hruai state sorkar aiawhte nen an thil phut chungchangah inbiakna an neih tawh thu leh inremna an siam loh thu a sawi.

State sorkar aiawhte nena meeting-ah hian Chief Secretary Lawmkunga chuan state cabinet thutlukna lo chuan JAC te tan eng mah a tih theih loh thu a sawi.

JAC leh state sorkar chuan May 19, 2010 khan memorandum of understanding (MoU) an lo ziak tawh a, mahse he thuthlung hi tihpuitlin a ni lo.

Rajendro chuan an thil phut chu Chief Minister Ibobi Singh hnenah vawi eng emaw zat an thlen tawh thu sawiin, sor­karin a bawhzui ngai loh thu a sawi a, mass casual leave an laa nawrh an huaihawt hnuah an kal zel dan tur chu la rel chhunzawm zel an tum thu a sawi bawk.

JAC chuan thla hlawh tihpun an phut bakah old pension scheme kalpui te, Adhoc, Muster roll, casual employee leh contract employee te tihngheh, sorkar department ṭhenkhat privatise tumna kalpui loh leh 7th Pay Commission rawtna kalpui te a ni.

Pensioners’ Union chuan JAC te an thlawp tih lantir nan April 28 leh 29 hian Chingamakhong, Imphal-ah sit-in protest huaihawt a tum.