BSF-BGB te'n ngawrh zawka ramri venhim tum

Border Security Force (BSF) leh Border Guards of Bangladesh (BGB) chuan May 3-a Tripura Tribal Autonomous District Council (TTADC) inthlanna neih tur denchhenin Tripura-a India-Bangaladesh ramriah khauh zawka venhimna kalpui an tum.

BSF leh BGB chuan kar kalta Inrinni khan Tripura chhim lam, Sabroom khuaah Inspector General level meeting an nei a, ramri venhimna chungchang hi an rel bakah TTADC inthlanna tibuai zawnga chet tumte beihlet dan tur an rel bawk.

BSF official te hi Inspector General BSF, Tripura Frontier B N Sharma-a'n a ho a, BGB officialte hi BGB South East Region Chittagong, Brigadier General Md Habibul Karim-a'n a ho thung.

Meeting-ah hian BGB chuan Bangladesh, Chittagong Hill Tracts-a border outpost (BOP) eng emaw zat hawn an tumnaah India ram lama lirthei kawngpuite an hman theih nan BSF te ṭanpuina an ngen a, BSF official te chuan hemi atana an thil tih theihte lo bawhzui an tiam a ni.