NEIGRIHMS-ah H1N1 testing centre hawng dawn

Union Health Ministry chuan North Eastern Indira Gandhi Regional Institute of Health and Medical Sciences (NEIGRIHMS)-a laboratory chu H1N1 (swine flu) testing centre-a siam a nih tur thu a puang.

Central Health Services-a Additional Director General Ashok Kumar chuan kar kalta Inrinnia North Eastern Council (NEC) Secretariat-a 'swine flu' chungchanga meeting neihah he thu hi a sawi a ni.

Kumar chuan NEIGRIHMS laboratory chu H1N1 laboratory testing facility-a thuam ṭhat thuai a nih tur thu sawiin, hemi kawngah hian Union Health Ministry-in phalna pek thuai a tum thu leh hmarchhak state te'n an chhawr ṭangkai theih tur thu a sawi.

Meghalaya Health official chuan tun hnaia India rama swine flu natna hri lengah Meghalaya-ah natna vei an hmuh loh thu meeting-ah hian a sawi a, natna vei rinhlelh mi pali te blood sample chu Dibrugarh Medical College-ah thawn niin, an fihlim thu a sawi.

Hetihlai hian NEC-a Health Adviser Bamin Tada chuan hmarchhak bialin health infrastructure, doctor leh paramedical personnel a neih ṭhat loh thu a sawi bawk.

"Hmarchhak biala health care delivery system chu tihchangtlun a ngai nasa hle a, hemi atan hian sorkar laipui chuan state sorkar te nasa zawka a ṭanpui a ngai a ni," tiin Tada chuan a sawi.