Manipur: Zanin zanlai aṭangin Naga ten bandh huaihawt dawn

United Naga Council (UNC) chuan Manipur sorkarin district pasarih a siam thar duh lohna lantirin, zanin zanlai aṭangin Manipur-a Naga te chenna huam chhungah darkar 48 awh total bandh a huaihawt dawn.

Manipur-a Naga pawl lian ber, UNC chuan Manipur-a BJP sorkar Congress sorkar laia district awmsa thendarhin district thar pasarih hi a siam a, he thutlukna a siam dawn hian stakeholder leh Naga mipuite a berawn lo niin a sawi. He thutlukna hi Manipur sorkar leh Naga hnamten Memoranda of Understanding (MoUs) pali an lo siam tawh bawhchhiatna a ni tiin, kum 2011-a sorkar laipuiin a lo tiam tawh palzutna a ni bawk tih an sawi.

UNC chuan district thar siam a nih dan chu democracy kalphung kalh leh, mipuitea inṭhendarhna thlenna a ni tiin, he thil avang hian lungawi lohna pawh nasa taka lantir a lo ni tawh a, ni 139 chhugin zet national highway pawh dan a ni bawk a ni, a ti. Naga mipuite lungawi loh avangin sorkar laipui, state sorkar leh Naga pawl aiawhte chuan ṭum eng emaw zat inbiakna an nei a, inbiakna an neih hnuhnung ber chu kum 2019, March 19 ah khan a ni.

District pasarih siam tharte sut leh tura state sorkar an ngen chungchangah hmasawnna engmah a awm loh avangin, UNC chuan Naga chenna bial huam chhungah total bandh huaihawt hi a tum a ni. Nawrh an huaihawt tur hi Naga mipuite chu thlawp turin an ngen a, an thil phut tihhlawhtling tura sorkar nawrna turin an ṭan ho a pawimawh thu an sawi. Bandh huaihawt hian essential service, media leh emergency case te a huam lo ang.

Manipur-a BJP sorkar chuan Congress sorkar laia district siam, Imphal East, Thoubal, Ukhrul, Senapati, Tamenglong, Churachandpur, leh Chandel district aṭangin district pasarih, Jiribam, Kakching, Kamjong, Kangpokpi, Noney, Pherzawl, leh Tengnoupal te a siam belh a ni. Heng zinga pahnih, Jiribam leh Kakching chu valley district niin, a dangte hi hill district an ni.

Manipur sorkarin nawrh huaihawt tum ṭhulh turin ngen

Manipur sorkar chuan United Naga Council (UNC) ten darkar 48 chhung bandh huaihawt an tum chu ṭhulh turin a ngen ve thung.

UNC hnena lehkha an thawnah, Mani pur sorkar chuan sorkar laipui, state sorkar leh UNC aiawhte chu an thil phut chungchangah inbiakna neih chhunzawm leh a remtih thu sawiin, ministry of home affairs aiawh tur hi AK Mishra, advisor (Northeast) a nih tur thu a sawi bawk.

Commissioner-cum-Secretary (Home) N Ashok Kumar chuan inbiakna neih hun tur leh a hmun pawh hi a rang thei anga bera tihfel tum a nih thu a sawi a, hei vang hian UNC chu an nawrh tum ṭhulh a, boruak ṭha lo thleng palh thei tur venga sorkar laipui leh state sorkar hmalaknaah thawhpui turin a sawm a ni.