Tripura : CMJAY hnuaiah damlo 12,000 chuangin a thlawna enkawlna dawng

Tripura chief minister Manik Saha chuan mipuite hman theiha chhawpchhuah anih aṭangin,Chief Minister Jan Yojana 2023 (CMJAY 2023) scheme hnuaiah dam lo 12,000 chuangin damdawiin hrang hrangah a thlawna inenkawlna an dawng tawh tih a sawi. CMJAY hnuaiah hian Ayushman Card nei hi mi 4,48,709 an awm a ni.

Chief Minister hian Thawhlehnia Pragna Bhawan-a National Voluntary Blood Donor Day leh Ayushman Bharat Pradhan Mantri Jan Arogya Yojana state-level programme kum ruk tlin lawmna hmannaah he thu hi a sawi a ni.

Health ministry changtu ni bawk, CM Saha chuan Ayushman Bharat Pradhan Mantri Jan Yojana (ABPMJAY) hi September 23, 2018 khan hman ṭan theiha tura siam a ni thu sawiin, hei hi chhungkaw dinhmun harsa zawkten damdawi lam inenkawlna kawnga puihna tura tih a nih thu a sawi. Dam lo inenkawlna senso hautak avangin mi tam tak chu dinhmun harsa leh rethei takah an awm phah thu a sawi bawk.

"He scheme hi hlawhtling takin kum ruk chhung kalpui a ni tawh. He scheme hnuaia hamṭhatna dawngtu mi 3,43,985 ten damdawiin hrang hrang, ramchhung leh pawnah te a thlawna inenkawlna hi an lo dawng tawh a, hemi atana sum sen zat hi Rs vbc 195.51 a tling tawh a ni," a ti.

Saha chuan state chhungah ABPMJAY hmang hian chhungkaw pakhatin kum khatah Rs nuai 5 zel a thlawna inenkawlna dawngin, hamṭhatna dawngtu mi 15,35,364 te chuan Ayushman card hi an nei tawh tih a sawi bawk. February 15, 2024 khan Chief Minister Jan Arogya Yojana 2023 (CMJAY) hi state chhung mipui zawng zawng hman theih tura tura siam niin hun rei lote chhungin mi 4,48,709 ten CMJAY hnuaiah hian Ayushman Card an nei tawh bawk.