Manipur-a buaina chungchang UNHRC ah sawi ho

United Nations Human Rights Council (UNHRC) session vawi 57-na, Geneva a neihah Manipur tualchhung buaina thleng mek chungchang chu an sawi ho.

He session hi, 'Manipur Crisis and Human Rights Situation in the Western South-East Asia (WESEA) Region' tih niin, India leh Bangladesh aṭangin activist leh academics te kal khawmin, Manipur-in ni 500 chuang buaina an tawh chungchang an sawi ho a ni. He hun hi UK-a Aston University-a visiting professor, Elangbam Bishwanjeet an a kaihruai a ni. Panel-ah hian International Peace and Social Advancement (IPSA)-a working president Khuraijam Athouba, Manipur-a D.M University associate professor Arambam Noni, Swiss-Bangladesh Women Association advisor Dilara Malique leh human rights defender Punam Duhotia te an tel a ni.

Khuraijam Athouba chuan tualchhung buaina rawn in ṭanchhuah dan te, endikna awm loa ram pawn lam aṭanga pem lut awm dan te, ramri kaltlanga helpawl chetna thleng ṭhin bakah chi leh chi inkara buaina rawn chhuah dante a sawi a ni. Manipur a inbeihna thlenga 90% chu Kuki helpawl te tih niin, ramdang mi helpawl Zomi Revolutionary Army te pawh buaina thlentu niin a sawi bawk.

Athouba chuan an buaina thlentu dang leh chu opium ching ṭhin te an nih thu sawiin, heng mite hian dan phal lohin Manipur sorkar ramte an hmang ṭhin a ni, a ti. Elangbam Bishwajeet chuan Manipur-a tharum thawhna thleng mek chu a rang lama tih tawp a ṭul a sawi bawk a ni.

Aramban Noni chuan Manipur-a chibing politics kalpuina chuan state chhunga hnam hrang hrangte inkara khi zau tak a siam zel tih a sawi.