Arunachal: Itanagar Police leh RGU-in MoU ziak

Arunachal Pradesh-a Itanagar Women Police Station-a Ane's Home ah counselling centre siamna turin Itanagar police leh Rajiv Gandhi University (RGU) chuan Memorandum of Understanding (MoU) an a ziak.

He centre hi mipat hmeichhiatna lama tihnawmnah tawk te, inchhunga tharum thawhrum tuar ṭhin te bakah harsatna lian tak tawh vanga rilru lama hliam neite enkawlna pekna tura siam a ni ang.

MoU hi Capital Police aṭangin DySP Chamrak leh RGU aṭangin Dr. NT Rikam ten DGP Anand Mohan kaihhruaina hnuaiah an ziak a ni. Superintendent of Police Rohit Rajhir Singh chuan RGU nena an thawhdunna chuan harsatna tuartu mi tam takte puihna leh chhawmdawlna ṭha tak a siam dawn tih a sawi. RGU hian department hrang hrang - Social Work, Psychology, National Security Studies leh Law te aṭangin volunteer siamin, buaipui ngaite chu a ṭul angin an pui dawn a ni.

RGU Vice-Chancellor Prof. Saket Kushwaha chuan rilru lam hriselna leh dan hmanga enkawlna pek a pawimawh thu sawiin, he thawhdunna hmang hian harsatna tawkte chuan a hun takah ṭanpuina a dawn theih phah dawn a ni, a ti.