Manipur : Mipuiin Ukhrul police station luh chilh

Manipur-a Ukhrul khua police station chu mipui thinrimin an luh chilh a, silaite an ru chhuak tih Ningani khan official ten an sawi.

He buaina 'Swachhata Abhiyan' hmanna denchhena Naga hnam pawl pahnihten khaw chhunga ram tih fai tur an inchuhna aṭanga irh chhuak a ni. Buaina hi punlun zelin police station te an bei tel ta a ni. Buaina chhuakah hian mi pathum an thi a, mi 20 in hliam an tuar.

Pawl pahnih inkara buaina chhuak vang hian Ukhrul khuaah hian punkhawm khapna thupek ti chhuak nghalin, mobile internet service pawh tih tawp a ni bawk.

Official chuan, "Ukhrul khuaa buaina a chhuah hnu hian ṭhalai ṭhenkhat pungkhawm chuan Wino Bazar-a police station hi an luh chilh a, silaite an ru chhuak a ni," a ti. Ralthuam an ruk chhuah zat leh eng ang chi nge tih erawh sawichian a la ni lo a, chhui chian mek a ni.

Manipur tualchhung buaina chhuah hnu hian police station hrang hrang bei a, ralthuam ruk chhuah a thleng fo a ni. Mahse heng thlenna hmunte hi Meitei leh Kuki hnam chenna huam chhung a ni a, tun ṭum hi Naga tamna bial chhunga police station luh chilh a nih ṭum khatna a ni.

AR in Tengnoupal-ah grenade 42 leh IED 15 man

Assam Rifles sipaite chuan Manipur-a Tengnoupal district-a Senam khuaah ralthuam ṭhahem tak an man. An ralthuam man zingah hian improvised explosive devices (IEDs) 15 leh country made grenade 42 a tel.

Sipaite hian an thu dawn bawhzuiin ralthuam dap hna hi Senam khuaah hian a nei a, ngawrh taka an zawn hnuah an man thei ta a ni. IED leh grenade te bakah silai mu, detonator leh inbeihna hmanrua dangte pawh an man tel bawk. Heng an ralthuam mante hi Manipur Police kutah hlan chhawng nghal a ni.

Assam Rifles te hian thla khat liam ta khan Tengnoupal district ramri ah hian helpawl - Kanglei Yawol Kanna Lup (KYKL), People's Liberation Army of Manipur (PLA) leh United National Liberation Front-Koireng (UNLF-K) mi leh sate an lo man tawh bawk.