Meghalaya : Zu burah QR code dah vek dawn

Meghalaya sorkar chuan zu aṭanga an sum lak luh tihpunna tur leh, dan phal loha zu zawrh ṭhin tihtawp a nih theihna turin state chhunga zu an hralh chhuah zawng zawngah burah Quick Response (QR) code system dah vek a ni dawn tih a puang.

Revenue and Excise Department minister Kyrmen Shylla chuan he hmalakna hi a taka hmang turin thla hnih aṭanga thla thum chhung hun a la mamawh tur thu a sawi a, hetianga an tih chuan financial year kal mekah zu chhiah aṭang hian Rs vbc 500 hmuh chhuah an tum thu a sawi bawk.

Hologram system aṭanga QR code a an thlak hian zu chhiah an hmuh hi 5% aṭanga 10% ah a pun theih an beisei a ni. Shylla chuan he hologram system an hman hian sum hloh tur veng hle mah se sorkar chuan hmasawnna nei zel tura technology ṭha hman chu a tum tih a sawi a ni.

" He QR code system hmang hian bottle hran ṭheuhah code hran zel a awm dawn a, hei hian zu chhia leh a lem siamna kawngah a veng thei dawn a ni," a ti. Zu chhia leh lem an man chhuahte chu a kaihhnawih company thlengin an tuar dawn tih sawiin, tun hnaiah state chhunga sorkarin a phal loh zu siam tumna a tam hle niin a tarlang.

Hetih mek lai hian sorkar chuan zu zawrh chhuahna kawnga dan phal loha thil ti ṭhinte venna tura hologram supply-tu company nena an contract chu a pawtsei bawk.

State sorkarin ruahmanna thar a siam ang hian Meghalaya-a Indian Made Foreign Liquor (IMFL) awrh chhuah zawng zawngah QR code-based tracking system dah a ni ang. Shylla chuan he system hi hman ni mah se zu man tih san a ni dawn lo tih sawiin, Assam aia a la tlawm chhunzawm zel tur thu a sawi.