Hmarchhak state zingah Manipur-in loan scheme kalpui ṭha ber

Manipur chu hmarchhak state zingah street vendor hnena loan pekna,  Pradhan Mantri Street Vendor’s Atma Nirbhar Nidhi (PM-SVANidhi) scheme kalpui ṭha berah thlan a ni. 

Chief minister N Biren Singh chuan hemi chungchang hi a Facebook-ah tarlangin, Hilly Region and North Eastern States category-ah Manipur chu PM-SVANidhi kalpui ṭha ber, loan pek chhuak hnem ber a nih thu a sawi. 

Thawhṭanni khan Biren Singh hian Chief Minister Secretariat-a Manipur Urban Development Agency hun buatsaihah, street vendor 3,326 hnenah loan a sem chhuak leh a ni. 

Loan pekchhuak zingah 3,015 hi PM-SVANidhi  hnuaiah pek niin, 347 chu MUDRA scheme hnuaia pek anni thung. August 25 aṭang khan CM hian streen vendor-te tan loan hi ṭum thum a lo semchhuak tawh a ni. 

PM-SVANidhi hi union ministry of housing and urban affairs-in Covid-19 hripui leng vanga eizawnna leh sum lakluhna kawnga harsatna tawk, street vendor-te chhawmdawlna tura a duan niin, June 1, 2020 khan hawn a ni. 

Manipur-ah chuan PM-SVANidhi leh  MUDRA scheme hnuaiah street vendor 5,354 te hnenah loan hi pek a ni tawh. State sorkar chuan vendor 20,000 te hnenah chhawmdawlna hi pek a tum a ni. Street vendor-te hian loan hi Rs 10,000 chin an la thei a, hei hi kum khat chhung thla tinin an rul ang.