Assam : Geleky-a camp sak chu chawlhsan turin Assam sorkar hriattir

Ministry of Environment, Forest and Climate Change (MoEFCC) chuan Assam leh Nagaland ramri hrul, Sivasagar district-a Geleky Reserve Forest hmuna commando battalion camp sak mek chu chawlhsan nghal turin Assam sorkar a hriattir.

Camp sakna tur project siam a nih laia Assam principal chief conservator of forest (PCCF), MK Yadava phalnain Geleky reserve forest-a ram 28 hectare-a zau chu camp sakna atan sahthlak a ni. Hei hian Forest (Conservation) Act, 1980 a bawhchhia tiin Ministry hnenah an zualko hnuah, project thawk chhunzawm tawh lo tura hriattirna hi a tih chhuah a ni.

Assam sorkar chuan project chu ramngaw humhalhna tur atana tih a ni tiin ṭang mah se, Ministry lam chuan chhuanlam tlingah an ngai lo thung.

Shillong-a MoEFCC regional office buatsaih Site Inspector Report (SIR) in a tarlan danin, ram hectare 28-a zaua camp sak chu rei tak daih tura sak a ni a, project thawh phalna pawh hna ṭan hnuah chauh lak a ni, a ti.

Forest (Coservation) Act in a phut angin forest rama forest kaihhnawih thil ni lo hmalakna a awm dawn chuan, sorkar laipuiah phalna lak hmasak a ngai a ni.

MoEFCC chuan phalna la hmasa loa forest rama battalion camp sak chu dan kalh a ni tiin, camp sak chawlhsan tura hriattirna chu zawm nghal a nih loh chuan duh vang reng dan bawhchhiaa ngaih a nih tur thu a tarlang. Forest (Conservation) Act tlawhchhanin project thawh phalna petu Assam Forest department official-te lakah legal action la turin a hriattir a, he dan hnuaiah hian thiam loh changte chu ni 15 thleng tan tir theih an ni ang.

Kumin May thla khan National Green Tribunal chuan Geleky-a forest ram dik lo taka hman a ni chu chhui chiang turin committee a lo din tawh a, Assam Forest Department chu ram hectare 28 -a zau phalna mumal nei lo a ti chereuah puhin petition a lo thehlut tawh bawk. Petition thehluhah chuan M.K Yadava chu a thu neihna hmang sual a, dan lo anga porject thawh phalna pechhhuakah puh a ni.

Hei bakah hian, NGT New Dellhi branch pawhin Yadava inrawlhna tho Assam Hailakandi district-a dan kalha ramngaw tih chereu chungchang a chhui mek bawk.