Manipur : Meitei Tribe Union in Kuki-Zo ST status paihsak tir tum

Meetei (Meitei) Tribe Union (MMTU) chuan Manipur-a Kuki-Zo hnam Scheduled Tribes (ST) status aṭanga paih phutna chu Supreme Court-ah thlen an tum.

MMTU chuan Kuki-Zo hnam dan loa Myanmar aṭanga rawn pem lut tiin an sawi a ni. Rampawn mite electoral roll-a ziahluh leh ST status pek hi India danpui palzutna a ni, an ti. Hei bakah hian sorkar laipui chu ram leilung fate nuaibona tur kalpuia puhin, Manipur Foreigners' Act 1948 palzutah a puh bawk.

Thuchhuah an siamah, MMTU chuan Kuki-Zo hnam dik lo takin 1950 khan ST list-ah telh an ni tiin, kum 1956 khan "Kuki-Zo" tih pawh "any Kuki-zo tribe" tihin thlak a ni a, hei hian Myanmar aṭangin mi tam tak an rawn luh belh tih a tichiang hle a ni, an ti. State dangah pawh dik lo taka ST list-a telhte pawh paih an lo ni tawh ṭhin tiin an tarlang.