Tripura: Congress-in sorkar aṭangin white paper an phut

Tripura Congress chuan kar liamta Zirtawpni khan press conference koin, tun hnaia helpawl, NLFT leh ATTF mi leh sa sorkara inpete chungchangah thu chiang zawk hriat duhin white paper an phut tih an sawi.

Hei bakah hian sorkar chu tualchhung buaina avanga awmna mumal nei tawh lo te tana chhawmdawlna puang turin a ngen bawk.

Tripura Pradesh Congress Committee (TPCC) president Asish Kumar Saha chuan Congress chuan state ralmuanna tura hmalakna zawng zawng chu a thlawp tih a sawi a, "September 4 khan NLFT leh ATTF pawlte nen inremna thuthlung ziah niin, September 14 khan mi tam tak sorkarah an inpe a ni. BJP in sorkarna a siam hnuah, khatih laia chief minister Biplab Kumar Deb chuan state chhungah inrikrapna thil zawng zawng nuai bo a ni tawh tiin a puang a ni. Inrikrapna engmah a awm tawh lo tih tuna chief minister Manik Saha pawh hian a pawm," tiin a sawi.

Kum eng emaw zat chhung chu mipuiin sorkar laka helna an hriat tawh loh laiin, CM Saha chuan NLFT leh ATTF mi leh sa 584 sorkarah an rawn in pe niin a sawi leh a ni.

"Tuilian avangin mi nuai 20 chuangin harsatna an tawh mek lai leh, chhiatna thleng avanga Rs vbc 15,000 vel chan a nih mek lai hian state sorkar emaw central sorkar emawin hmalakna mumal engmah an la nei lo. Hei bakah hian, helpawlte ralthuam thehluh hi mihring inpete ai pawhin a tlem zawk. Sorkar lakah eng ang takin nge an hel tih pawh hi tumahin an hre lo. Chuti chung chuan, helpawl inpete tan hian chhawmdawlna tam tham tak ruahhman a ni a, tuilian tuarte tan chuan chhawmdawlna engmah pek a ni ve lo," tiin helpawlte inpek chungchanga thuchiang zawk an hriat theih nan white paper chhuah turin sorkar a phut.