Tripura : Zirtirtu banten tiam chin awm loa nawrh huaihawt

Tripura-a zirtirtu aṭanga ban tak takte chuan Thawhṭanni aṭang khan an hna thawh tir chhunzawm phutin tiam chin awm loa nawrh an huaihawt. 

Joint Movement Committee (JMC) hmingin nawrh hi huaihawt a ni a, state sorkarin an hnaah dah let a tiam hma chuan nawrh an tum tih an sawi. 

JMC convenor Dalia Das chuan chief minister Biplab Kumar Deb chuan October 3 khan an harsatna tawh chu thla hnih chhunga chinfel sak a tiam tih a sawi. Mahse thla hnih a liam hnuah pawh CM leh a kaihhruai sorkar chu hma lakna engmah an nei lo a, hei vang hian sorkar nawrna atan nawrh huaihawt hi a ṭul ta a ni, a ti. 

Convenor dang, Bimal Saha chuan March thlaa zirtirtu aṭanga bante chuan eizawnna kawngah harsatna nasa tak an tawk chho a, an zingah ṭhenkhat phei chu an intihlum hial niin a sawi. 

Kum 2002, 2006 leh 2009-a zirtirtu atana lakte chu lak an nih danah thil dik tawk lo a awm nia High Court-ah khin an nih hnuah kum 2014 khan Court chuan zirtirtu banna tur hi a tichhuak a ni. Supreme Court-ah zualko a ni leh a, mahse Supreme Court pawhin kum 2017 khan High Court thutlukna hi a pawmpui a ni. Zirtirtu aṭanga ban takte hi an vaiin 10,323  an ni a, mahse state sorkar chuan a hnuah an zinga 1,400 vel chu department dangah a dah lut a ni. Tun thlengin zirtirtu ban tak, hna dang la nei lo  hi mi 8,882 an la awm. 

Supreme Court chuan Tripura sorkar hnenah zirtirtu ban takte hi kum 2023, March 31 thleng chu hna dang an dilnaah an kum bithliahah ngaihnathiamna siamsak turin a ti a ni. State cabinet chuan September 22 khan zirtirtu bante hi sorkar department hrang hrangah Group C leh Group D-a lak an nih theihna tura policy siam a lo remti tawh bawk. 

Tripura-ah hian government leh government-aided school 4,400 a awm a, hengah hian zirtirtu 27,000 vel an awm mek a ni.