Meghalaya: Tuilian vangin Garo Hills-ah mi 15 thi tawh

Meghalaya-a Garo Hills-ah Pathianni khan tuilianin chhiatna a thlen vangin mi panga an thih belh leh a, tuilian leh a kaihhnawih chhiatna thleng vanga thi hi mi 15 an tling tawh.

Pathiannia thi zinga mi, Bijoy S Sangma leh a fapa Wian Chigado R Marak chu West Garo Hills district-a Dimapara lei bulah tuilianin a la a, Amerin K Marak leh a fanu Manase K Marak chu East Garo Hills-a Gongdop khuaah leiminin a hnawl a, Thenseng R Marak chu East Garo Hills district Songsak Reserve Forest huam chhunga lirthei a khalh laiin thing tluin a delh a, a hmunah hian a thi nghal bawk a ni.

Inrinni liam ta khan chhiatna thleng vangin mi 10 vel an thi a, an zingah West Garo Hills district-a leiminin a hnawl chhungkaw khata member pasarih an tel.

Pathiannia Garo Hills district-a chhiatna thleng chungchang review meeting an neihnaah, Meghalaya chief minister Conrad K Sangma chuan nunna chan ta zawng zawng chhungte hnenah a rang thei ang bera zángnadawmna pek an nih tur thu a sawi.

National Disaster Response Force (NDRF) leh State Disaster Response Force (SRDF) te chuan chhiatna thlen nasat zualna hmunah hian mi zawn hna leh chhanchhuah hna an thawk nghal a ni.