Sikkim: Gorkha hnamte tan tribal status pek vek phut

8th October, 2024

Sikkim leh Darjeeling tribal aiawhte chuan Gorkha hnam zinga tribal status la nei lote hnena tribal status pek vek an phut.

Pathianni khan tribal aiawhte hian Siliguri-ah meeting an nei a, he hunah hian Sikkim chief minister Prem Singh Tamang (Golay) leh Darjeeling MP Raju Bista te thlawpna hnuaiah joint committee an din a ni. Meeting-ah hian Sikkim cabinet minister te pawh an tel a ni.

CM Golay chuan an meeting chu chhinchhiah tlak, politics inrawlh miah lohna meeting a nih thu sawiin Sikkim leh Darjeeling-a tribal status pek phut chungchangah joint action team, Sikkim leh Darjeeling aiawh member panga ve ve awmna an din thu a sawi. He team hian Scheduled Tribe (ST) phut te chungchang zirchianna an nei dawn a ni a, a ti.

Sikkim leh Darjeeling-a tribal status phutte hi - Kirat/Khambu/Rai, Gurung, Mangar, Thami, Sanyasi (Jogi), bahun, Chhetri, Bhujel, Kirat/Dewan, Sunuwar leh Newar te an ni. Heng hnam 11 te bakah hian Sikkim-a Majhi hnam pawhin tribal status hi an phut ve bawk.

Golay chuan, "Darjeeling-ah hnam 11 leh Sikkim-a hnam 12 in tribal status hi an phut mek a ni. Sikkim leh Darjeeling-a tribal aiawhten Nepali ṭawng chu Constitution in 1992-a an pawm theih tur leh, 2022-a Tamang leh Limbu hnamte tribal status pekna tura an thawk ho thei a ni chuan, tunah pawh eng vangin kan thawh ho theih loh ang,? " a ti.

Tribal status pek phutna hian thlawp pawh an hlawh hle a, BJP pawhin 2019 a Lok Sabha inthlanpui neih dawn khan poll manifesto ah an lo dah tel tawh a ni.

Mahse tun hnaiah union tribal minister Jual Oram-a'n Sikkim Rajya Sabha member Dorjee Tshering Lepcha hnena lehkha a thawnah, Sikkim leh Gorka chen tamna biala hnam 12-te tribal status dilna hi Registrar General of India (RGI) in a pawm loh thu a sawi. State/UT sorkarin rawtna leh sawifiahna te chu RGI leh National Commission for Schedule Tribes (NCST) in an ngaihtuah a ngai a ni tiin, RGI chuan a zirchiang tawh a, a pawm lo niin a tarlang. Majhi hnam chungchangah Sikkim sorkar aṭangin dilna hi hmuh a la ni lo niin a sawi bawk.