Manipur zirlai pawl parukin nawrh huaihawt Covid-19 SOP zawm loah CM an puh

Manipur-a zirlai pawl paruk chuan an state-a hri leng dona kawnga hmalakna dan tur, policy mumal tak siam tura sorkar phutin Thawhlehni khan Keishampat Leimajam Leikai-a communtiy hall-ah joint protest an huaihawt. 

Zirlai pawlte chuan  chief minister N Biren Singh chu by-election neih tur atana campaign a neihnaah hri darh tur venna atana sorkarin kaihhruaina a siamte zawm lohah an puh a, sorkar chu hri leng dona hmalakna mumal tak nei lo leh, hri dona aia by-election neih tur buaipui zawkah an puh a ni. 

Nawrh huaihawta tel zirlai pawlte chu - All Manipur Students Union (AMSU), Democratic Students Alliance of Manipur (DESAM), Apunba Ireipakki Maheiroi Singpanglup (AIMS), Kangleipak Students Association (KSA), Students Union of Kangleipak (SUK) leh Manipur Students Federation (MSF)-te an ni. 

Manipur-ah hian Covid-19 kai hi an pung chak leh hle a, hei vang hian a darh zual zel tur venna atan sorkar chu policy ṭha tak siam a, hmang turin an phut. Sorkar hotute chu an state-a hri darh tur ven dan ngaihtuah aiin, thil dik lo tiah an inpuh tawn zawk a ni, an ti. 

Chief Minister ngei pawhin Covid-19 SOP a zawm lo a,mi tam tak punkhawmna hmunah campaign-te a nei a, hetihlai hian an state-a hri kai pun chak chungchangah mipuiten SOP an zawm ṭhat loh vang niin a puh let thung a ni, tiin SUK president H Dhanakumar chuan a sawi. Mipuite awmkhawm lo tur leh, dan zawm ṭha tura a tih laia campaign a neih theihna tura mi tam tak punkhawm a phal thung chu an dem hle tih an sawi.