Gauhati High Court-in Assam Forest Dept. sum chawitir

Gauhati High Court chuan Dibru-Saikhowa National Park huam chhunga Oil India hnena hmun pasariha lei verh phalna a pek chungchang sawifiah tura a tihna a chhan let loh avangin Assam Forest Department chu Rs 10,000 chawi turin a ti.

National Park chhunga oil laih chhuah phalna pek chungchangah advocate Mrinmoy Khatniar leh mountaineer Amar Jyoti Deka-te chuan High Court-a hian PIL an thehlut a ni. Court chuan Forest Department hnenah insawifiah turin a hriattir a, mahse court hriattirna hi an chhan let loh avangin Thawhlehni khan chief justice (acting) N Kotiswar Singh leh justice Manish Choudhary awmna bench chuan pawisa hi an chawitir ta a ni. November thlaah hemi chungchang hi ngaihtuah chhunzawm leh a ni ang. 

Tun thla tir lam khan Gauhati High Court chuan mipuite ngaihdan la loa OIL hnenah hydrocarbon project pasarih thawhna tura phalna pek chungchangah thuneitu hrang hrang 14 hnenah hriattirna a lo pe tawh a, an zingah hian sorkar laipui, state sorkar, pollution control board, forest department leh Oil India pawh an tel. Kar hnih chhunga chhanna pe turin a ti a ni.