Ṭhenawm state-te thuchhuahin Manipur a nghawng thei - Manipur CM

Manipur chief minister N Biren Singh chuan Thawhlehni, October 8, 2024 khan an ram ṭhenawm state, Nagaland leh Mizoramin ram dang aṭanga pem chungchanga thuchhuah an siam Manipur-ah nghawng ṭha lo a thlen thei tih a sawi.

Chief Minister chuan official-te chu dan phah loha an state-a pem luh tumte chu lo dang zel tur leh, inralring reng turin a ti.

Tun hnaia Nagaland sorkarin thuchhuah a siamah, an rama pem lutte dan anga pawm an nihna turna kum bithliahah hnam ṭhenkhat tan 1963 a nih laiin ṭhenkhat tan 1940 an hmang niin Singh chuan a sawi. Mizoram sorkar pawhin an thuchhuah siamah 1951 hnu lama an state-a pem lutte chuan ram an lei theih loh thu an tarlang bawk niin a sawi. Hetianga ṭhenawm state pahnihte hmalakna hian Manipur-ah nghawng a nei thei dawn a ni, tiin a sawi.

Nagaland sorkar chuan kum 1963, December 1 hma lama Kohima district-a Garo, Kuki, Kachari leh Mikir (Karbi) awmte leh, kum 1940, December 31 hma lama Nepali/Gorkha hnam inbengbelte chu chipchiar zawka zirchianna an neih tur thu an puang a ni.

Chief Minister Singh chuan an ṭhenawmte state-ten dan loa pemlut tam tak avanga buaina an tawh mek a hmuhin Manipur sorkar chuan inchimbuaina laka an him zawk nan hma a lak nghal thu a sawi. Mao Gate leh Jiribam bikah invenna khuahkhirh zawk an kalpui thu a tarlang bawk.