Tripura: Durga Puja lawm dan turah sorkarin khuahkhirhna a siam

Tripura sorkar chuan state chhunga Durga Puja lawmna neih turah loud speaker leh a kaihhnawih sound system chi hrang hrangte chu noise pollution ti tlem thei tur ang bera hman a nih theih nan dan a siam.

Director General of Police (DGP) Amitabh Ranjan chuan dan siam hi palzut an awm chuan hrem an nih tur thu a sawi. Hunpuiah loudspeaker leh horn hmanga thawm bengchheng siam hi ramchhung hmun hran hranah buaina a nih ziah thu sawiin, High Court pawhin hetiang vennan hian thuchhuah a lo siam tawh bawk.

Sub-division zawng zawngah noise-measuring machine sem a ni dawn a, zing dar 6 aṭanga zan dar 10 thleng chiah thawm bengchheng danin a phal chin siam hi phal a ni ang.

Khawpui leh thingtlangahte uluk taka en zui a ni dawn a, thupek zawm lote pawh a rang thei anga bera hremna pek nghal zel an ni dawn a ni. DGP Ranjan chuan mipuite leh media mite chu an chhehvelah dan phal loha thawm bengchheng siam an awm chuan report zel turin an ngen a, dan phal chin thawm neih kenkawh kawnga hmalak chu an thil tum ber ani tiin, "He dan hi hman ngei a ni em tih hre turin theihtawp kan chhuah dawn a ni," a ti.