Nagaland-a hri kai hmuh thar zingah minister tel

Nagaland minister for rural development Metsubo Jamir chuan Covid-19 a kai tih Nilaini khan a sawi. Hemi ni hian state chhung hri kai hmuh thar 67 an awm a ni. 

Minister chuan a twitter-ah Delhi aṭanga a haw hnua a in test-naah hri a kai hi hriat a nih thu a sawi a, mahse test nawn leh a ni dawn tih a sawi  bawk. Tun hnaia amah nena inhnaihna lo neite chu fimkhur tur leh, inkhung hrang nghal turin a ngen bawk.

Nagaland-ah hian Covid-19 kai hmuh tawh mi 5,671 awmin, an zinga 4,507 chu an dam leh tawh a ni. Hri kai zinga mi 10 in an thihpui tawh a ni.  

Sikkim chief minister Prem Singh Tamang nupui, Krishna Rai pawhin Covid-19 a kai tih hriat a ni. An chhungkaw zinga ṭhenkhat pawhin an kai tih hriat a ni bawk. 

Krishna Rai chuan a Facebook-ah hri a kai thu hi ziakin, "Theih­tawpin hri laka invengin kan fim­khur a, mahse vanduaithlak takin a kai zingah kan tel ve ta a ni. Tunhnaia contact kan lo neihte pawh in test ve nghal turin kan ngen a ni," a ti. Rai chuan doctor-te thurawn angin amah leh a chhungte chu an chenna inah an inkhung hrang nghal tih a sawi bawk. 

Health department chuan thuchhuah siam nghalin CM official residence, Mintokgang  chu Corona Care Centre-ah hman nghal a nih thu leh, doctor leh nurse-te pawh dah an ni thu a sawi.  Mintokgang hi CM hlui Pawan Chamling-a'n a chhuahsan hnuah luah lohin a awm a, CM thar hi insawn duh loin he hmun hi cancer hospital atana siam a tiam a ni. Sikkim-ah hian hri kai hmuh tawh hi 2,547 awmin, mi 1,942 enkawl dam an ni tawh.