Nagaland-in fuel-a Covid-19 chhiah lak a titawp

Nagaland sorkar chuan Covid-19 leng dona atana sum mamawhte phuhrukna tur kawng khat atana petroleum product-a Covid-19 chhiah a lak chu a titawp dawn. 

April 28 zanlai aṭanga khan Covid-19 chhiah hi lak niin, diesel-ah litre khatah Rs 5 leh petrol litre khat leh motor spirits dangah Rs 6 a lak belh a ni. Chhiah lak belh aṭanga sorkarin  sum a hmuh hi cheng vaibelchhe 10.32 a tling hman a ni.

Civil society leh political party hrang hrangin Covid-19 chhiah lak hi titawp tura an nawr hnuah, sorkar chuan thutlukna hi a siam ta a ni. DNSU chuan September 19 khan sorkarah chhiah lak tharna hi titawp tura ngenna thehlutin, a titawp lo a nih chuan state chhunga petrol pump-te kharah an vau. State cabinet chuan pawl hrang hrangte ngenna hi ngaihtuahin titawp a rel ta ni. 

COVID-19 spokeperson Neibal Kronu chuan hri leng chuan ram economy a nghawng hle tih sawiin, April- June 2020 chhung sorkar sum hmuh chu hemi chhung vek, kum 2019 aiin 23.9% in a tlahniam tih a sawi. Sorkar hnathawkte hlawh tihsan a nih vang te, sorkarin contractor-te leiba te a pek a ngaih bawk avangtein sum indaih lohna a nasa zual a, kum kal mek 2020-21 a sorkar sum indaih lohna tur chu Rs vbc 2358.81 vel ni tura chhut a nih thu a sawi.