Manipur-ah private school-te October aṭangin hawn tum
United Association of Recognised Schools of Manipur (UARSoM) leh Hill District Private School Association Manipur (HiDiPSAM) chuan state chhunga recognised private school-te chu October thla aṭangin hawn vek an ni dawn tih an puang.
Saingaiprou, Imphal-a UARSoM leh HiDiPSAM-ten joint meeting an neihnaah he thutlukna hi an siam a ni. Association-te chuan state sorkarin zirna in hawn leh hawn loh chungchangah thutlukna a la siam theih loh avangin, private school bikah chuan anmahniin thutlukna hi an lo siam mai tih an sawi.
Meeting-ah hian private school-te chu April thla aṭanga school haw a nih hma chu zirlaite aṭangin tuition fee 50% chauh la turin an ti bawk. UARSoM general secretary S Seikhojam Kipgen chuan tuition fee 50% lak a nihchuan private school neitute chuan zirtirtu leh non-teaching staff te hlawh chu an pe thei dawn a ni, a ti.
June 20 khan education department (schools) chuan thupek tichhuakin, zirlai 200 aia tlem nei private school-te chu tuition fee la lo tur leh, thawktute hlawh 50% pe turin a ti a, hetihlai hian zirlai 700 chunglam neite chu tuition fee la lo a, thawktute hlawh 100% pe turin a ti thung.