Nagaland: 25th Hornbill Festival lawm dan turah Cabinet review nei

Nagaland state cabinet chuan Nilaini, October 10, 2024 khan 25th Hornbill Festival lawm dan tur inbuatsaihna chungchang an sawi ho.

Hornbill Festival hi Dec 1-10 chhungin Heritage Village, Kisama a neih a ni leh dawn a ni.

Cabinet meeting-ah hian festival buatsaih leh lawmna tura Tourism Department hmalaknate sawiin, festival hlawhtling taka neih a nih theihna tura stakeholder hrang hrangte thawhhona ṭha an mamawh thute an sawi bawk.

Sorkar thupuangtu leh minister for power and parliamentary affairs, K.G Keyne chuan an ramria buaina thleng mek karah Nagaland mi zawng zawng tan he hunpui hi hman a nih tur thu a sawi. He festival hi state pawn lam aṭanga rawn chhimtute tana chanchin hriatreng tlak siam turin a sawm nghal bawk a ni.

Tribal hnam, Hohos leh pawl dang aiawhte pawh coordination meeting neihpuiin, festival laia tui supply leh connection lama harsatna an tawh ṭhin dante pawh an sawi bawk.

Tourism commissioner leh secretary, G. Hukugha Sema chuan he festival hlawhtlinnna atana tribal pawl hrang hrangte pawimawh thute a sawi a, a hma lama hlawhtlinna an neih dante sawi chhuakin, kumina festival an neih tur pawh a hlawhtlin theihna turin sorkar chuan theihtawp a chhuah dawn tih a sawi bawk.