Tripura : District Council tan Rs vbc 30 ruahman

Tripura sorkar chuan Tripura Tribal Areas Autonomous District Council (TTAADC) chhunga hmasawnna hna pawimawh paruk thawhna turin Rs vbc 30 a ruahman.

TTAADC hian state Tribal Welfare Department-ah ngenna theh lutin, Sixth Schedule area-a infrastructure, khawsak phung, zirna, hriselna lam leh tribal mipui hmasawnna hna thawh tur hrang hrangte a tarlang a ni. An rawtna thehlutte hi a ngaihtuah hnuah, sorkar chuan a hnathawhna tur sum hi a ruahman sak ta a ni.

Chief minister Manik Saha chuan sorkar chuan state leh central budget aṭangin fund hi pek a ni dawn ti a sawi, tribal hnamte chawikanna tur te, an eizawnna lamah pawh hma an sawn a, an ṭhan chhoh zelna turin scheme hrang hrang siam a nih thu a sawi. CM chuan project zingah hian Kherengbar CHC tihchangtlunna tur leh, Mobile Medical Unit siamna tur pawh a tel tih a sawi.