Rights panel-in Meghalaya-a department pahnih hriattirna pe
Meghalaya Human Rights Commission (MHRC) chuan Meghalaya-a Health department leh Social Welfare department chu kumin April - July thla chhunga state chhunga nau piang hlim 877 leh nu, naupai lai 61-te thihna thleng chungchang sawifiah turin hriattirna a pe.
MHRC chuan Thawhlehnia hriattirna a pekah hian Constitution-a Article 21 hnuaiah mitinten 'right to life and health' an neih chu fundamental right tih tarlan a nih thu leh, state sorkar chuan heng an dikna chanvo neihte hi a venghimin a humhalh sak tur a ni, a ti. Thla reilo te chhunga nau piang hlim leh naupai lai tam tham tak thihna thleng chu human rights palzutna lian tham tak a ni tiin, deparment pahnihte hnenah ni 30 chhung ngeia report thehlut turin a ti a ni.
Social activist Agnesw Kharshiing chuan MHRC-ah hian petition thehlutin, Covid-19 a len hnuah nausen leh nu tam tak an thi tih a tarlang. Hemi hnu hian Director of Health Services chuan hri len hnu hian nau piang hlim 877 leh naupai lai 61 an thi tawh tih a tichiang ve leh a ni. Petition thehluttu chuan nau piang hlim tam tak thihna thlenna chhan hi damdawi lam enkawlna pek ṭhat tawk loh vangte, Pneumonia leh an pian hlima boruak tlakchham vang an nih thu a sawi. Raipuar tam zawk thihna chhan chu nau neih dawn hnaih tawhah pawh damdawi-ina admit an nih loh vang tih a sawi bawk.