Manipur: Police station leh outpost dah belh dawn

Tualchhung buaina thleng mekte thunun a nih theihna tura sorkar laipuiin Manipur police force thuam chak a remtih sak hnuah, police station leh outpost dah belh a ni dawn.

Chief minister N Biren Singh hoa CM secretariate-a cabinet meeting neihah, Sadar Hills (Kangpokpi), Churachandpur (Sonpi) leh Tamenglong/Noney district pengṭhuam laia awm, Joujangtek khuaah police station siam thar turin an ruahman a ni.

Cabinet meeting hian Tamengling district-a Nungsai leh Khoupum Tehsil khua bakah, Imphal West district-a Singda Dam aṭanga km 19 a hlaah police outpost thar pahnih dah turin thutlukna an siam bawk

Manipur-ah hian police hi 42,000 awm mekin police station 44 a awm bawk a, police station thar pakhat an siam bakah hian, hill district leh valley district-ah police outpost hi a inzat ve ve dah thar tum a ni.

Kum 1949-a India-a a inchhunluh khan police station panga leh outpost pasarih a awm a ni. Tun dinhmun chuan tualchhung buaina a thlen chhoh reng avangin dan leh thupek kenkawh kawnga pui turin security force hi 60,000 aia tam an awm mek a, an zingah hian Assam Rifle, CRPF, ITBP leh Indian Army pawh an tel. Manipur tualchhung buaina hi May 3, 2023 ah rawn chhuak ṭanin mi 230 chuangin nunna an chan tawh a ni.

West Imphal-ah mi pakhat kap hlum

Manipur-a West Imphal-ah misual tu tih hriat lohin mi pakhat a kaphlum a, mi dang pakhatin hliam a tuar bawk niin nimin khan police-ten an sawi.

Nunna chan ta hi Sorokhaibam Iboton Singh (60), Naoremthong Khulem Leikai, Imphal West-a cheng niin, a ruang hi hmun fal tak Langdol Wangdei Meitei Leikai ah October 8 khan an hmu a ni. Pawikhawihtu hi an la hre chhuak lo. Ruang hi Ningani khan RIMS Imphal-ah mitthi dahna hmunah a chhungten hmuin, amah a ni tih an hrechhuak ve chiah tih official ten an tarlang.

Ningani vek khan Uripok Tourangbam Leikai-a cheng Sorokhaibam Amarjit (26) chu tu tih hriat lohin silaiin a kap a, hliam a tuar bawk. Amarjit chu Uripok Sorbon Thingel, RIMS hospital bulhnaiah zan dar 7:30 vel khan a ke ah kah hliam a ni a, RIMS Hospital-ah hmanhmawh takin kalpui nghal a ni.

Imphal police te chu pawikhawihna hmunah hian kalin Amarjit-a kah a nih chhan hi an la hrechhuak thei lo. Imphal police station-ah thubuai ziahluh nghal a nih thu an sawi.