Meghalaya: East Khasi Hills DC-in Durga Puja ralmuang taka lawm tiam

Meghalaya-a East Khasi Hills Deputy Commissioner RM Kurbah chuan Durga Puja lawmna lo awm tur chu ralmuang taka hman a nih tur thu a sawi a, pandal te pawh vantlang hmun ti hnawk lo leh dal lo zawnga sak a nih tur thu a sawi.

Hynniewtrep National Youth Front (HNYF) chuan Puja hman tur chungchangah hian complaint thehlutin, vantlang kawngpuiah te traffic tibuai zawnga pandal sak an duh loh thu an tarlang. An complaint hi chhanglet nghalin, DC Kurbah chuan magistrate te leh police te chu dan kenkawh lama hma la turin an thawkdun dawn tih a sawi a ni.

DC chuan India ram hian kut lawm chungchangah sakhaw tih bik leh huam bik a neih loh thu a sawi a, kut chi hrang hrang lawm ṭhinte hian zah an phu vek a ni, a ti. Durga Puja lawm a nih hun chhung hian a hmun leh hmate uluk taka enthlithlai reng a nih tur thu leh, puja committee te chu venhimna ṭha zawk kalpui a nih theih nan CCTV camera te pawh hmang turin a chah bawk.

Tun hnai khan Puja lawmna tura pandal siam ṭhenkhatte chu vantlang hmun dal zawnga sak an ni tih thuthang a awm. Mahse thuneitu lam chuan ngaihven zui nghalin, hnawksak zawnga pandal sak emaw sakna hnuhma hmuh tur a awm loh tih an sawi a ni.