Sorkar laipui, Manipur sorkar leh UNC-ten thuthlukna siam thei lo November 15-ah inbe leh dawn

Sorkar laipui, Manipur sorkar leh United Naga Council (UNC)-te’n New Delhi-a inbiakna an neih chu thuthlukna mumal siam loin nimin khan tihtawp a ni. Mahse party pathum-te hian inbiakna neih leh an remti vek a, November 15, 2024-ah Senapati, Manipur-ah inbiakna neih leh an rel.

Meeting-in resolution-in a tarlan danin, December 8, 2016 lo tihchhuah tawh angin Manipur-a district thar pasarih siam belh a nih chungchang sawiho a ni deuh ber. Meeting-ah hian UNC chuan district thar siam belh an duhlohnate an thlen nawn leh bawk. Boruak ṭha tak hnuaiah inbiakna hi neih niin, hun kal tawh lama an intiamnate theihnghilh loa a rang thei ang bera buaina chinfel dan tur ngaihtuah ho an rel.

Meeting-ah hian sorkar laipui aiawhin A.K. Mishra, Advisor (North East), Ministry of Home Affairs a tel a, Manipur sorkar aiawhin Chief Secretary Vineet Joshi leh Commissioner-cum-Secretary (Home) N. Ashok Kumar-te an tel. UNC lam hian hi an aiawh tur mi pasarih a tir bawk.