CM Zeliang-a'n a cabinet a tilian

Nagaland Chief Minister TR Zeliang chuan Thawhṭanni khan a cabinet tilianin, BJP MLA, tuna Parliamentary Secretary ni mek Paiwang Konyak chu cabinet minister-ah a lalut a, parliamentary secretary thar panga a ruat belh bawk.

Minister leh Parliamentary secretary thar te lakluhna inkhawm hi Raj Bhawan-ah neih a ni a, Governor PB Acharya-a'n a kaihruai. Inkhawmah hian NPF president Shurhozelie Liezietsu, BJP president M Chuba, JD(U) party hruaitute bakah sorkar official te an tel.

Cabinet Minister thar Konyak hi Transport leh Information & Public Relations portfolio pek a ni.

NPF kaihhruai Nagaland sorkara cabinet minister 12 zinga pali chu kumin January 5 khan an hel avangin Chief Minister Zeliang-a'n a ban a, NPF MLA a laka hel te party aṭangin an hnawtchhuak bawk. Hemi aṭang hian state sorkar hian Chief Minister telin minister pariat a nei a ni.

Chief Minister Zeliang chuan parliamentary secretary thar te hna chanpual chu minister post ruak dang May thla tira a hnawhkhah hunah a sem tur thu a sawi.

Nagaland-a rorellai NPF party chhung buaina avangin NPF MLA 22 chuan Chief Minister Zeliang chu thlak an phut a, February 5 khan Zeliang-a sorkar hi confidence motion hmang fiah a lo ni tawh bawk. Zeliang-a sorkar fiahnaah hian Speaker tel loin MLA zawng zawngin a thlawp lamah vote an thlak a, Congress MLA te pawhin an thlawp vek a ni.

Zeliang-a laka hel NPF MLA, Noke Wangnao leh G Kaito Aye te chuan NPF party neitu chuhin, Election Commission-ah an zualko zui a, mahse EC chuan party buaina chu convention neia party chhunga chingfel turin thutlukna a lo siamsak a ni.

Zeliang-a'n parliamentary secretary thar a ruatte hi independent MLA pali leh BJP MLA pakhat an ni a, tun term kal mek hi MLA an nih vawi khatna vek a ni.

Hetihlai hian Nagaland sorkar chuan lirnghing tuar mek Nepal ram chu cheng nuai 10-in a ṭanpui.

Nepal ṭanpuina atan Chief Minister Zeliang leh Governor Acharya chuan cheng nuai nga ve ve an thawh a, thu­chhuah an siamah Nepal mipuite an tawrhpui thu an tarlang.

Governor chuan Nepal mipuite ṭanpui nan Nagaland mipuite chu an theih tawka sum thawh ṭheuh turin a ngen bawk.