Sum indaihlohna vangin railway project khawtlai phah
Northeast Frontier Railway hnuaia project hrang hrang kalpui mekte chu sum indaihlohna avangin a khawtlai.
Minister of State for Railways Manoj Sinha chuan he thu tun hnai khan Lok Sabha inkhawmah a sawi a, New Jalpaiguri-Murkongselek inkara rel kawng double-a siam nan cheng vaibelchhe 445 ruahman a nih thu leh sum ruahman chu project atan a tlem a rin thu a sawi a, hei hian project a tihkhawtlai phah a rin thu a sawi bawk.
Hetihlai hian Union Minister Sinha chuan rel kawng double-na project kalpuina atan budget-ah sum dah a ni tih a sawi. Kawng double-na tur project te hi kilometre 142-a thui, New Bongaigaon-Kamakhya inkara a ni a, hemi atan hian cheng vaibelchhe 1,889 ruahman a ni. Kilometre 176-a thui, Bongaigaon-Goalpara-Guwahati inkar siam nan cheng vaibelchhe 1,831 ruahman a ni bawk a, kilometre 102-a thui, Digaru-Hojai project atan cheng vaibelchhe 945 ruahman a ni bawk. Heng project atan hian kum 2015-2016 Union Budget-ah cheng vaibelchhe 64 dah a ni.
New Jalpaiguri-New Bongaigaon-Rangiya-Guwahati inkar rel kawnga electrification tihna atan kum 2015-2016 Union Budget-ah cheng vaibelchhe 107 dah a ni bawk.
Union Minister Sinha chuan tunah rih chuan Guwahati-Lumding-Dimapur-New Tinsukia-Dibrugarh inkara rel kawngah electrification project kalpui an la tum loh thu a sawi bawk.