BJP President-in Agartala a tlawh

Hmarchhak state hrang hrang tlawhkuala zin mek, BJP President Amit Shah chuan Thawhṭanni khan Tripura khawpui, Agartala a thleng.

Vantlang inkhawm buatsaihah thu sawiin, Amit Shah chuan Prime Minister Narendra Modi kaihhruai sorkar laipui chuan hmarchhak bial hmasawnna daltu tibo turin theihtawp a chhuah dawn a ni, a ti.

BJP President chuan hmarchhak bial­ah Bangladesh mite chu enfiah lohin tam takin an lut a, hemi veng tur hian sorkar laipui chuan Bangladesh ramri-ah venhimna a tihkhauh thu a sawi.

Central-a BJP sorkar chuan hmar­chhak biala inkalpawhna ṭha a awm theihna turin ruahmanna ṭha tak a siam a, Manipur-ah sports university din a ni dawn a, hmarchhak bial leh ṭhenawm ramte inkarah insumdawn tawnna hun remchang zawk a siamsak a, ramchhung khawpui hrang hrangah hmarchhak zirlaite tan hostel siam a tum bawk a ni, a ti.

Hmarchhak state-te chuan eirukna avangin hmasawnna tak tak an dawng lo a ni tiin, Shah chuan "Hmarchhak biala eirukna hi a zung aṭanga phawi a ngai a, mipuite'n a takin hmasawnna an hmuh a ngai a ni," a ti.

Congress kaihhruai UPA sorkarin kum 10 ro a rel chhung khan cheng vaibelchhe nuai 12 eiruk a nih tih hai­chhuah a ni a, hetihlai hian BJP-in thla 11 ro a rel chhungin eirukna thleng pakhat pawh hailan tur a la awm lo a ni, tiin BJP President chuan a sawi.

Tripura-a rorellai, Communist Party of India-Marxist (CPI-M) kaihhruai Left Front sorkar chu rorel dik loah Amit Shah chuan a puh bawk. Tripura Chief Minister Manik Sarkar-a'n sorkar lapuiin mi rethei zawkte tana inhlawhna MGNREGS (Mahatma Gandhi National Rural Employment Guarantee Scheme) tihtawp a tum nia sawi chu thu dik lo a nih thu sawiin, Shah chuan, "BJP sorkar chuan rural job scheme hi thuam chak zel a tum zawk a ni," a ti.

Inkhawm buatsaihah hian Amit Shah bakah BJP general secretary Ram Madhav, party national secretary Anil Jain, Tripura observer Anil Deodhar leh Tripura state unit president Sudhindra Dasgupta te pawhin thu an sawi a ni.

Amit Shah hian Thawhṭanni vek khan Tripura-a an party hruaitute meeting a neihpui nghal bawk.