Congress-in tribal council tihchangtlun an tiam

Tripura Tribal Areas Autonomous District Council (TTAADC) inthlanna atana Congress party-in manifesto an tihchhuahah TTAADC chu thuneihna pek belha, tihchangtlun an tiam.

Congress chuan thlan tlin an nih chuan TTAADC tihchakna atan Parliament-a Sixth Schedule amend-na turin theihtawp an chhuah tur thu an tarlang.

Sixth Schedule amendment an tumah hian TTAADC chu Tripura Tribal Areas Autonomous State Council-ah leh an tum a, sorkar laipuia UPA sorkar lai khan Sixth Schedule amendment bill hi putluh an lo tum tawh a, mahse hun an neih loh avangin an pass hman ta lo a ni, an ti.

Congress party chuan TTAADC-in sorkar laipui aṭanga direct funding an hmuh theih nan theihtawp chhuah an tiam bawk.

Hetihlai hian Twipraland te'n inner line permit (ILP) system kalpui an phut chu Congress chuan manifesto-ah an tilang lo.

Tripura PCC president Birajit Sinha chuan TTAADC huam chhunga cheng, tribal te chuan inkalpawhna kawngpui, tui thianghlim in tur, electricity leh health care an neih ṭhat loh thu a sawi a, Tripura-a rorellai CPM kaihhruai, Left Front sorkar chu tribal te ngaihthahah a puh bawk.

Sinha chuan TTAADC area-a mipuite chu inthlanah Congress party thlang tlinga, hamṭhatna hmu thei tura inbuatsaih turin a ngen.