GNLA te'n helicopter kahthlaksakah police te an vau
Meghalaya Director General of Police (DGP) Rajiv Mehta-a'n helpawlte beihna atan helicopter hman an rawt thu a sawi hnuah Garo National Liberation Army (GNLA) helpawlte chuan thuchhuah siam nghalin, helicopter te chu police helicopter emaw civilian te chuanna pawh ni se kahthlak vek an tum thu an tarlang.
GNLA joint publicity secretary chuan thuchhuah a siamah 'fake encounter'-a civil mi thihna thubuai chhuina, magisterial enquiry neih mek tihkhawtlai a ni chu state Home Minister leh DGP te thil tihrukah an puh bawk. DGP chuan tun hnai khan police te chu fake encounter-ah an inhnamhnawih ngai loh thu a sawi a ni.
GNLA chuan Garo Hills-a sorkar rorelna chu police te'n a kalpui nia an ngaih thu tarlangin, magisterial inquiry neih a nih laiin eng tin nge DGP-in police te chu fake encounter-ah an inhnamhnawih ngai lo tia sawi theih? tiin hemi chungchanga state Home Minister a ngawih reng avangin police leh Home Minister chu an rinhlelh thu an tarlang bawk.
"State sorkar hian mipuite hriat loha thil tihruk tam tak a nei a, hei vang hian police te chungah an thuneihna an lekkawh ngam lo a ni. Police te ro an rel chuan mipuite chuan an tuar dawn tihna a ni," tiin GNLA thuchhuak chuan a tarlang bawk.
Police te helicopter hman an tum chu an hlauh loh thu tarlangin GNLA thuchhuah chuan helicopter hman tumna chu police te ral rel dan chi khat mai a ni, an ti a, an member te chu an pawl hotute thupek zawm tura zirtir an nih thu leh an hotute'n an lu zawna thlawk apiang kap tura an tih chuan an kah mai tur thu a tarlang