NSCN (R)-in inkahhai thuthlung ziak

SS Khaplang-a kaihhruai Nationalist Socialist Council of Nagaland (NSCN-K) aṭanga chhuak te'n tun hnaia an din, NSCN (Reformation) chuan Thawhṭanni khan sorkar laipui nen inkahhai thuthlung an ziak.

NSCN (R) hotu Y. Wangtin Naga chuan he thu hi sawiin, thil pawimawh dang chu inbiakna neih leh hunah an la sawi chhunzawm zel tur thu a sawi a, sorkar laipui leh NSCN (R) chuan inbiakna an la chhunzawm zel dawn a ni, a ti.

Hetihlai hian NSCN (K) chuan sorkar laipui nena inkahhai thuthlung an ziah, tawp tawh chu an la chhunzawm duh lo zel a, Nagaland Governor P.B. Acharya leh Chief Minister T.R. Zeliang chuan Naga peace process a rang lama chinfel a nih theih nan NSCN (K) inkahhai thuthlung chhunzawm turin an ngen.

Governor chuan Thawhṭannia minister leh parliamentary secretary tharte lakluhna inkhawm neih zawhah Nagaland-a remna leh muanna a awm theih nan NSCN (K) chu inkahhai thuthlung nei chhunzawm zel tura a duh thu a sawi.

Union Ministry of Home Affairs-a Joint Secretary (NE) Shambhu Singh chuan NSCN (K) te hmarchhak bialah pawikhawihna leh tharum thawhna an thlen a nih chuan dan angin an chungah action an lak tur thu a sawi.