Manipur: Manipur MLA-ten Delhi-ah meeting nei

Ministry of Home Affairs buatsaihin Thawhlehni, October 15, 2024 khan New Delhi-ah Manipur tualchhung buaina thleng mek chungchang sawi hoin meeting neih a ni. He hunah hian Manipur MLA rual - Kuki-Zo-Hmar, Meitei leh Naga hnam aiawhte an tel.

Meeting hi Bharatiya Janata Party (BJP) MP leh northeast coordinator Sambit Patra-a'n a kaihruai a, advisor (northeast) A.K Mishra leh joint director Rajesh Kamble te chu sorkar laipui aiawhin an tel a, Rajya Sabha MP Ajit Gopchade pawhin a telpui bawk. Manipur-a hnam chi thum MLA ten May 3, 2023-a an state-a buaina a chhuah hnua joint meeting an neih vawikhatna a ni. Mahse meeting-ah hian Manipur chief ministre N Biren Singh leh union home minister Amit Shah erawh an tel lo.

MHA thuchhuah chuan meeting-ah hian Manipur-a hnam hrang hrangte chu an state-a buaina thleng ṭhinte titawp a, mipui pawisawi lo nunna chan an awm tawh lohna tura hma la tura an duh thute sawi ho a nih thu a tarlang.

Meeting-an neih zawh hian Kuki-Zo MLA te chuan thuchhuah siamin, sorkar laipuia official-te leh BJP hruaitute nen room hranah meeting hi an neih thu sawiin Meitei MLA leh Naga MLA te nena meeting-ah erawh an tel loh thu an sawi.

Manipur tualchhung buaina chhuah ṭan tir, May 3, 2023 aṭang khan mi 237 in nunna an chan tawh a, mi 60,000 chuangin an chenna in an chhuahsan tawh bawk.