Tripura: Hnam leh hnam inkar buaina chhuak

North Tripura district-a Kadamtala-ah Thawhlehnia Durga lawmna tura sum khawn chungchangah chi leh chi kara buaina chhuakah mi pakhatin nunna a chan a, mi dang 17 in hliam an tuar.

Kadamtala buaina chhuah hnu hian Pekucherra, Panisagar area ah buaina dang a chhuak zui ve leh bawk. Shiv temple suasam a ni tih an hriat hnuin mosque complex a in sak lai mek chu an bei ve leh a ni.

State sorkar chuan buaina chhuak vang hian mobile internet service a ti tawp nghal a, North District Superintendent of Police Bhanupada Chakraborty pawh sawn a ni nghal bawk. Dhalai Superintendent of Police Avinash Rai chu North Tripura district he charge la tur hian dah a ni.

Secretary (Home) Dr.Pradeep Kumar Chakravarty chuan thuchhuah siamin, North Tripura district hmun ṭhenkhatah buaina chhuak vang hian Indian Telegraph Act, 1885-a Section 52 hnuaiah darkar 72 chhung, October 15, 2025 tlai dar 5 aṭanga hman ṭan turin khapna siam a nih thu a sawi. He khapna hian mobile service provider, mobile internet, data service leh press communication zawng zawng a huam a ni. Khapna thupek zawm lo chu Bharatiya Nyaya Sanhita (BNS) Section 223 hmang hrem theih an nih thu a tarlang nghal bawk.

Dhalai Superintendent of Police Avinash Rai chuan tun dinhmunah chuan buaina a reh tawh thu a sawi a, buaina te tham la awm mahse inrem tura inbiakna te neiin senior officer ten an telpui thu a sawi.