NE CM te'n PM inrawlh turin an ngen
Hmarchhak state Chief Minister te chuan ṭangruala resolution siamin, hmarchhak state te chu Special States Category status-a an awm chhunzawm theih nan leh sorkar laipui aṭanga special fund an dawn chhunzawm theih nan Prime Minister Narendra Modi inrawlh turin an ngen.
Hmarchhak state Chief Minister te chuan Prime Minister Narendra Modi hnena lehkha an thawnah an resolution siam chungchang chu May thla kar hnihna vela anmahni sawipui turin an ngen bawk.
Tun thla tira North Eastern Council (NEC) Plenary Session neih ṭum khan hmarchhak state Chief Minister te hian Special States Category status-a dah chhunzawm chungchangah resolution siam an lo tum tawh a, mahse DoNER Minister Jitendra Singh chuan NEC chu hetiang resolution siamna tur a nih loh thu sawiin, hmarchhak state Chief Minister te hmalak tumna a lo dansak tawh a ni.
Tripura Chief Minister Manik Sarkar chu hemi kawnga sulsutu leh resolution buatsaihtu a ni a, hmarchhak state dang Chief Minister- Tarun Gogoi (Assam), Lal Thanhawla (Mizoram), Dr Mukul Sangma (Meghalaya), TR Zeliang (Nagaland), Nabam Tuki (Arunachal Pradesh), O Ibobi Singh (Manipur) leh Pawan Kumar Chamling (Sikkim) te'n hming an ziah hnan.
Resolution chuan 14th Finance Commission recommendation leh Union Budget (2015-2016) zirchian a nih hnuah special category status-a hmarchhak state-a dahna chu tihbo tumna a awm nia hriat a ni, a ti a, hei hi kaltlangpui a nih chuan state hnufual tak tak, hmarchhak state te chuan nasa takin an tuar dawn a ni, a ti.
Hmarchhak state tana chhiatna tur leh thil ṭha lo chu tun dinhmunah pawm theih a ni lo a, Special Category Status anga hmarchhak state te'n sum leh paia sorkar laipui ṭanpuina an dawn chu chhunzawm a ṭul thu resolution chuan a tarlang bawk.
Kum 2015-2016 Union Budget-ah Normal Central Assistance (NCA), Special Plan Assistance (SPA) leh Special Central Assistance (SCA) kaltlanga hmarchhak state te hnena ṭanpuina pek tumna a awm lo chuan hmarchhak state te sum leh pai dinhmun nasa takin a khawih buai dawn a ni, tiin resolution chuan a tarlang bawk a, hmarchhak state te chu infrastructure hmasawnna lama SCA leh SPA-a innghat an nih avangin tihtawp a nih chuan infrastructure-in a tawrh phah dawn a, hei vanga hian sorkar laipui ṭanpuinate hi chhunzawm a ṭul a ni, a ti.