AFSPA chungchangah sorkar laipui leh Arunachal inrem

Arunachal Pradesh district 12-a Armed Forces Special Powers Act (AFSPA) lekkawha disturbed area puan chungchangah sorkar laipui leh Arunachal Pradesh sorkar chuan remna an siam thei ta.

Union Ministry of Home Affairs chuan March 27, 2015-a AFSPA lekkawhna thuchhuah a lo siam tawh chu a hlip ang a, disturbed area-in a huam, district 12 chu district 9-a police station 16 huam chinah sawrzim a ni ang. Hemi chungchangah hian MHA chuan a tharin thuchhuah a siam ang.

District 9-a Arunachal-Assam ramria kilometre 20 bial chhung disturbed area-a dahna chu kilometre 30-a a bial tihzau a ni bawk. Hetihlai hian district pathum - Tirap, Changlang leh Longding district te chu disturbed area-a puan a lo nih tawh angin district pum chu disturbed area-a dah chhunzawm a la ni ang.

MHA chuan March 27-a AFSPA lekkawha district 12 disturbed area-a a puanna chu Arunachal sorkar chuan a hriat­pui loh thu tarlangin Chief Minister Nabam Tuki hoin an dodal a, state mipuite'n nasa taka an dodal hnuah sorkar laipui nen hian inremna an siam thei ta a ni.