Rio-a'n BSNL service chhia chungchang a tarlang CCS-in AP-a BSNL service tihchangtlun nan sum ruahmansak

Lok Sabha-a Nagaland aiawhtu, Member of Parliament (MP) Neiphiu Rio chuan April 27 khan New Delhi-ah Union Minister for IT & Communication Ravi Shankar Prasad leh state dang MP te nena meeting an neih ṭumin Nagaland leh hmar­chhak biala BSNL service chhe lutuk chungchang a tarlang.

Rio chuan Nagaland leh hmarchhak biala BSNL service chhe lutuk chu a rang lama siam ṭhat a pawimawh thu a sawi bakah hmarchhak biala telecommunication leh connectivity te chu tihchang­tlun a ṭul thu a sawi.

Nagaland BSNL-a National Federation of Telecom Employees te'n Nagaland BSNL headquarters, Kohima-a sawn an phut chungchang pawh Rio chuan a sawichhuak bawk a, India ramah Nagaland chauh hi state khawpuia BSNL headquarters nei lo an ni, a ti.

Nagaland MP Rio chuan hmarchhak bial leh Nagaland-a BSNL officer te awm hun chhung, kum khat leh a chanve chu kum thuma tihpun a duh thu Union Minister Prasad a hrilh a, BSNL hnuaia hnaruakah a tam thei ang ber Naga ṭhalaite chhawr tur leh hmarchhak ṭhalaite tan telecom sector-ah skill development programme duansak turin a ngen.

Rio hian telecommunication lama Nagaland harsatna hrang hrang tarlanna lehkha a thehlut bawk.

Meeting-ah hian Union Minister Prasad chuan Bihar, Meghalaya, Manipur leh Nagaland MP te a kawm a, a hmain hmarchhak state dang MP te bakah Rajasthan leh Himachal Pradesh MP te a lo kawm tawh bawk a, Department of Telecommunications (DoT) official te pawh an tel.

Prasad chuan MP zawng zawng te'n DoT official te hnena an state harsatna ṭheuh an thlen theih nan meeting dang la buatsaih zel turin DoT thuneitute a ngen nghal a ni.

IT & Communication Minister Prasad chuan BSNL tihchangtlun nan sorkarin theihtawp a chhuah mek thu a sawi a, BSNL network tihchangtlun nan DoT chuan BSNL hnathawh enpui turin cell a din tur thu a sawi bawk.

Hetihlai hian Prime Minister Narendra Modi-a'n thlaleha China a tlawh tur denchhenin Cabinet Committee on Security (CCS) chuan Arunachal Pradesh-a BSNL service tihchangtlun nan cheng vaibel­chhe 450 a ruahmansak.

Prime Minister Modi chuan May 14-16 chhungin China tlawh a tum a, hei vang hian CCS chuan Arunachal Pradesh-a inbiakpawhna lam tihchang­tlun chu thil ṭul a ni, a ti.

CCS chuan BSNL service tihchangtlun nan sum a ruahmansak bakah project kalpuina atana environmental clearance lamah harsatna a awm loh nan Right of Way (ROW) hmanga project kalpui a phalsak bawk.

BSNL chuan service tihchangtlunna project atan Arunachal Pradesh-a India-China ramri hnaiah GSM tower 1,893 bun a tum bakah leihnuai leh lei chungah optical fiber cable kilometre 3000 chuanga sei zam a tum bawk.