Tripura court-in dam chhung lung-in tang turin mi pali hrem

West Tripura District Court chuan October 1, 2008-a Agartala-a bomb puak kaihhnawihah Thawhlehni khan mi pali thiam loh a chantir a, dam chhung lung-in tang turin an chungthu a relsak.

October 1, 2008 hian Agartala-a Durga Puja lawmnaa, mipui punna hmun li-ah All Tripura Tiger Force (ATTF) helte chuan bomb hi an tipuak a, mi 100 chuangin hliam an tuar a ni. Police te chuan a hnuah bomb puak hman lo pathum an chhar bawk.

Tripura police-a Crime Investigation Deparment chuan hemi bomb kaihhnawihah hian ATTF hel, mi pasarih lakah chargesheet a thehlut a, thubuai hi kum 6 chuang ngaihtuah a nih hnuah Thawhlehni khan chinfel chauh a ni.

West Tripura Additional District Judge S.B. Dutta chuan mi pali thiam loh a chantirte hi Indian penal code section hrang hrang leh Explosive Substance Act tlawhchhanin, an chungthu a relsak.

Thiam loh chang- Bikash Debbarma, Kumaria Debbarma, Sachindra Debbarma leh Dinesh Debbarma te counsel chuan court thutlukna chu High Court-ah khin an tum thu a sawi.