TU-in rampawn zirlaite hip nan hma la dawn

India leh a ṭhenawm ram mipuite inkara inlaichinna leh thawhhona ṭha a awm theih nan Tripura University chuan rampawn zirlaite hip tumin hmalak a tum.

TU vice-chancellor Anjan Kumar Ghosh chuan he thu hi sawiin, Bangladesh zirlaite chuan Tripura University zawm a duh tiin a sawi a, ram dang zirlaite pawh hip an tum thu leh hemi atan hian ruahmanna lian zawk siam an tum thu a sawi bawk.

"Bangladesh bakah kan ṭhenawm ram- Nepal leh Bhutan zirlaite pawh kan university-a an zir duh kan ring a, kan university hi central university niin, tunah hian department 34 kan nei a, Bangladesh aṭangin zirlai pali kan nei mek a ni," tiin VC Ghosh chuan a sawi a, Bangladesh zirlai 20 chuan academic session 2015-16 aṭanga Tripura University zawm turin an hming an ziak­luh tawh thu a sawi bawk.

"Sorkar laipui leh state sorkarin kan ṭhenawm ramte nena inlaichinna ṭha neih tuma a beih lai mek hian heng rama zirlaite'n Tripura University an zawm chuan sorkar hmalaknain a hlawkpui dawn a ni," tiin Ghosh chuan a sawi.

Tripura University VC Ghosh chuan tribal hnam ṭawng humhalh nan leh theh­lar nan academic session thar aṭangin Mizo, Garo leh Kokborok ṭawng zirna siam an tum thu a sawi bawk. Kokborok hi Tripura-a tribal tam zawkte ṭawng hman lar a ni.

National Skill Development Corporation leh Tripura industry department nen ṭangrualin rubber technology leh video production lamah vocational course hawn an tum thu Ghosh chuan a sawi bawk.

Tripura University hi kum 1987-a din a ni a, kum 2007 khan central university status pek a ni. Private study group te'n India rampum university ṭha an zirchiannaah 43-na a ni a, India khawchhak lamah pali-na a ni bawk.

University hnuaiah hian affiliated college 46 a awm a, heng zingah hian professional college 17 leh medical college pahnih an tel a, zirlai inziaklut 38,114 an awm.