Manipur : BJP MLA-ten PM hnenah Chief Minister ban turin phut

Manipur-a BJP MLA 19 chuan prime minister Narendra Modi hnenah chief minister N Biren Singh ban tura phutna lehkha an thawn. He lehkhathawna sign-tu zingah hian Assembly Speaker Thokchom Satyavrat Singh, Minister Thongam Vishwajit Singh leh Yumnan Khemchand Singh te pawh an tel.

BJP MLA-te hian Thawhlehnia Meitei, Kuki leh Naga MLA te nena Delhi-a meeting an neih zawhah PM hnenah hian lehkha hi an thawn a ni. BJP MLA panga-ten Nilaini khan lehkhathawn hi an theh lut a ni.

Lehkhathawnah hian MLA-te chuan BJP kaihhruai sorkar chuan remna bakah nunphung pangngaiah a hruai leh thei dawn em tih chu state mipuite zawhna lian tak a ni tiin, boruak ṭha leh ralmuang siam a nih thuai loh chuan an bialte chuan an aiawha an thlante chu bang turin an nawr tih an sawi.

"Thahnemngai taka BJP thlawp tute kan ni a, mipuite min beiseina angin Manipur venhimna kawngah leh, BJP tluchhe tur venna kawngah mawhphurhna kan nei a ni," tiin an lehkhaah hian an tarlang. State chhunga chi leh chi inkara buaina thleng mek chinfel dan kawng awmchhun chu Chief Minister ban tir a ni tih an sawi.

BJP MLA-te chuan tualchhung buaina an tawh mekah security force dahbelh ringawt hi buaina chinfel nan a ṭhat ber loh thu an sawi a, a tlai tak tak hmaa Manipur chhanhimna atan hma la thuai tura an duhna pawh lehkhathawnah hian an tarlang a ni.