Arunachal : Chief secretary in Khagri Glacier expedition nei tur vai liam

Arunachal chief secretary Manish Kumar Gupta chuan Ningani khan Khangru Glacier Tawang district-a joint scientific expedition vawi hnihna neih tur chu a vai liam.

Centre of Earth Sciences & Himalayan Studies director (CES&HS) Tana Tage chuan he expedition-ah hian scientist rual leh research associate te bakah, National Centre for Polar and Ocean Research (NCPOR), Goa leh CES&HS Itanagar-a technical officer te, IIT Roorkee researcher te an tel tih a sawi.

"Arunachal Himalayas hian dinhmun derthawng tak a hmachhawn mek a, heng zingah hian sik leh sa inthlak danglam nasa, vur tlang tuiral mekin tuilian a thlen hlauhawm takte an tel a ni,": tiin Tage chuan a sawi. Hetiang boruak inthlak danglam avanga chhiatna thleng thei tur laka in venhim vat a ṭul thu a sawi bawk.

Tage chuan he expedition-ah hian chiang zawkin Arunachal Himalayas glaciological leh cyosphere zirchian a nih tur thu a sawi a, scientific activity hrang hrang - glacier flow discharge, riverbed profiling, steam ice drilling leh tui chim chin hriattheihna dah bakah hun rei zawk thlithlaina hun neih a nih tur thu a sawi bawk.

He team hian Polar and Cyosphere Studies (PACER) base camp nghet sakna tur hmun remchang an zawng nghal dawn a, helai hmuna glaciological zirchianna lo awm zel tur atan a ṭangkai hle dawn a ni, a ti bawk a ni.