Assam : CM-in Supreme Court thutlukna siamah thuchhuah la nei lo

Assam chief minister Himanta Biswa Sarma chu tun hnaia Supreme Court-in Citizenship Act,1955-a Section 6A chungchanga thutlukna a siam chungchangah thuchhuah engmah a la nei lo.

He section hmang hian East Pakistan, tuna Bangladesh ni aṭanga March 1971 hmalama Assam rama pem lutte chu India khua leh tui nihna pek an ni. Assam leh a kaihhnawih thil hrang hrangah CM hi a ṭawngchhuah vat ṭhin avangin, SC thutlukna siam chungchanga thuchhuah a la nei lo hian mak tih pawh a hlawh hle. A official X ah thuchhuah a neih ṭhin bakah Facebook ah zantin a live ṭhin a, tun ṭumah erawh darkar 24 ral hnu pawhin thuchhuah engmah a la neilo.

Supreme Court in October 17, 2024 a an thutlukna puanchhuah ah hian March 1971 hmalam zawnga Assam-a pemlutte khua leh tui nihna pek a ni. He thutlukna hi judge panga awmna, chief justice of India DY Chandrachud-a kaihhruai Constitutional Bench hi a siam a ni.

Chief Justice chuan Section 6A hman hi Assam-in pem lut tam vanga harsatna a tawhte chinfelna tur a ni tiin, sorkar laipui chuan he dan hi hmun dangah pawh a hmang thei a, mahse hman a ni lo tih a sawi. Assam-a pem lut leh an culture thlenga nghawng a neih dan hi hmun dang aiin a sang a ni, a ti.