Manipur-in sorkar hnathawk nuarte chungah action lak a tum

Manipur sorkar chuan sorkar hnathawk nuarte chu an hna an chhunzawm lo a nih chuan an chungah action lak a tum thu a tarlang.

All Manipur Trade Union Council (AMTUC) leh All Manipur Govern­ment Employees Orga­nisation (AMGEO) tangrual pawl, Joint Administrative Council (JAC) chuan state sorkarin an thil phut a tihhlawhtlin theih loh avanga an lungawi lohna lantir nan Thawhṭanni aṭang khan mass casual leave an la a ni.

Chief Secretary PC Lawmkunga chuan department hrang hrang hotute chu sorkar hnathawkte attendance report buatsaih tur leh hna thawk lote chungah action la turin a hriattir.

Sorkar hnathawk te'n mass casual leave an lak aṭangin Nilaini kha a ni thumna a ni a, sorkar office hrang hrangah hnathawk hmuh tur an awm lo a, Secretariat office-a security te chuan office ruak chhungah media mite luh an phal lo hial a ni.

JAC te casual leave lak hi ni thum awh tur a ni a, Nilaini khan a ni thumna a tlin tak avangin an kal zel dan tur a thara rel leh an tum a ni.

JAC chuan sorkar hna­thawkte thla hlawh leh an hamṭhatna dawn chung­changah state sorkarah an thil phut point 30 an thlen a, heng zingah hian old pension scheme kalpui te, Adhoc, Muster roll, casual employee leh contract employee te tihngheh, sorkar department ṭhenkhat privatise tumna kalpui loh leh 7th Pay Commission rawtna kalpui te a tel.

JAC hmalakna hi district tina sorkar hnathawk mi 69,000 chuangin an thlawp.